ច្បាប់ផ្សេងៗ
ចម្លងចេញអំពីសាស្ដ្រាស្លឹករឹត
ការផ្សាយរបស់ពុទ្ធសាសនបណ្ឌិត្យ
ការផ្សាយរបស់មណ្ឌលវប្បធម៌ខ្មែរនៅស្វីស
****************************************
ថ្ងៃអាទិត្យ ទី8.កញ្ញា 2013.ម៉ោង 9:40
បទវិចារណកថា
ដោយ កែវ ឈុន :
ថ្ងៃសៅរ៍ ទី2.សីហា 2014.ម៉ោង 18:24
បទកំណាព្យ ឬពាក្យឃ្លោងសំនួនចួនសំដី គឺជាអក្សរសិល្ប៍មួយប្រភេទ ដែលកវីអ្នកនិពន្ធធ្វើអោយពាក្យខ្លេងឃ្លោង ចួនរណ្ដំយោងយកទាញគ្នាទៅវិញទៅមកយ៉ាងពីរោះជក់ចិត្ដ។ ប្រជាជនខ្មែរគ្រប់គ្នា គង់បានជ្រាបយ៉ាងច្បាស់ហើយ ច្បាប់ផ្សេងៗទាំងអស់ សុទ្ធតែត្រូវបានតែងជាបទកំណាព្យពាក្យចុងចួនគ្នា ជាបទព្រហ្មគីតិ បទកាកតិជាដើម គឺជាចំរៀងបំពេលួងលោមម្យ៉ាង ដូចជាបំពេយោលកូនតូចអោយគេងលក់ ឬជាបទបំពេរកំសាន្ដម្យ៉ាង ដែលអ្នកសិក្សាបុរាណតែងទន្ទេញចាំរត់មាត់ ហើយស្រែកច្រៀង សូត្រកំដរបរិយាកាសធ្វើអោយធូស្រាល បំបាត់ការនឿយហត់ផ្សេងៗ ក្នុងពេលទំនេរៗខ្លះ ក្នុងពេលកំពុងប្រកបកិច្ចការនានាខ្លះ ក្នុងពេលធ្វើដំណើរក្នុងដងព្រៃជ្រៅម្នាក់ឯង ឬក៏ឃ្វាលគោក្របីតាមវាលស្រែជាដើម។
សិល្បៈរឿងល្ខោនមហោស្រព បទចំរៀង គឺជាសិល្បៈម្យ៉ាងអាចទាក់ទាញមនុស្សផងទាំងឡាយ អោយមានចំណង់ចំណូលចិត្ដបានយ៉ាងល្អ។ មិនថាក្នុងសម័យណាទេ វិធីសម្ដែង ល្ខោនមហោស្រព បទចំរៀង អាចបំពុលពង្វក់ស្មារតី អោយអ្នកស្ដាប់អ្នកទស្សនាសប្បាយឈ្លក់វង្វេងភ្លេចខ្លួនបាន ហើយជួនកាលដោយសារតែមហោស្រពសិល្បៈបរទេសនេះហើយ ដែលធ្វើអោយកូនខ្មែរភ្លេចស្មារតី នាំគ្នាបោះបង់សិល្បៈ វប្បធម៌ ប្រពៃណី ទំនៀមទំលាប់ ល្អៗរបស់ខ្លួនចោលអស់រលីងតែម្តង។
អ្នកប្រាជ្ញរាជបណ្ឌិត ចាស់បូរាណខ្មែរយល់យ៉ាងច្បាស់ ហើយរិះរកវិធីអប់រំកូនចៅតាមបែបសិល្បៈមហោស្រព មានកំណាព្យបទបំពេ ជាបទព្រហ្មគីតិ ឬបទកាកគតិ ដែលដាក់រួមចូលគ្នា ហៅថា ច្បាប់ផ្សេងៗនេះឯង ហើយជាមួយគ្នានេះគេក៏អាចទាញយកអត្ថន័យទាំងនោះមកធ្វើជាគតិដាស់តឿនរំលឹកទូន្មានខ្លួនតែម្ដង។ ថ្វីត្យិតតែអ្នកសិក្សាសម័យថ្មី មិនបានទន្ទេញបទកំណាព្យទាំងនេះចាំបានរត់មាត់ទាំងអស់ក៏ដោយ ក៏គេនៅចាំត្រង់វគ្គខ្លះបាន ហើយលើកយកមកសូត្រក្រើនរំលឹកទូន្មានខ្លួនជារឿយៗផងដែរ។