ការផ្សាយរបស់មណ្ឌលវប្បធម៌ខ្មែរនៅស្វីស
****************************************
៤. បទភុជង្គលីលា ថ្ងៃសៅរ៍ ទី11.កក្កដា 2020.ម៉ោង 12:34 | ||
ព្រះឥន្ទ្រទេវិន្ទធិបតី(១) | គន់គិតពិតពី | ចារណាយង់យល់។ |
ទេវីស្រីស្រល់និម៌ល | គាប់គូដំកល់ | ឲ្យជាភរិយា។ |
ភោគកុលនិម៌លកុមារ | ជាគូផងគ្នា | កុំឲ្យឃ្លៀងឃ្លាត។ |
គិតស្រេចសម្ដេចនរនាថ(២) | ចេញចាកប្រាសាទ | សួគ៌ត្រៃត្រឹស្សា។ |
ហោះដល់មណ្ឌលសីមា | សត្ដកុដរាជមហា | នគររម្យរ័ត្ន។ |
ព្រះសូរបន្ទូលទៅថ្វាត់ | ថាហៃមហាក្សត្រ | សត្ដកុដរាជា។ |
យើងមករួសរកប្រាថ្នា | សូមរាជធីតា | បុត្រមហេសីធំ។ |
យើងនឹងយកទៅផ្សែផ្សំ | នឹងប្រុសឧត្ដម | មួយមានចេស្ដា។ |
ជាគូនែបនិត្យស្នេហា | អ្នកនឹងបានជា | ក្សត្រថ្លៃថ្កើងថ្កាន។ |
សោយរាជអំណាចចៅហាន | គ្រប់គ្រងពារា- | ណសីនគរ។ |
ទើបមហាក្សត្រាបវរ | សោមនស្សសាទរ | ទៀងទូលទៅថា។ |
សក្កោទេវោរាជា | ទ្រង់ព្រះប្រាថ្នា | ចង់បានបុត្រី។ |
យកទៅលំនៅទូរទី(៣) | ឲ្យមានស្វាមី | ខ្ញុំសោតព្រមថ្វាយ។ |
ព្រះឥន្ទ្រទេវិន្ទពណ្ណរាយ(៤) | សោមន្សាសាយ | ត្រេកអរពេកពន់ក្ដាត់។ |
ទៅពបីយកស្រីរ័ត្ន | នានាំហោះថ្វាត់ | ទៅទីចម្ការ។ |
ដល់ស្រេចទើបស្ដេចកាឡា | និម្មិតកើតជា | ថង់ស្បែកមួយធំ។ |
ប្រមាណថង់មានទំហំ | ប៉ុនផ្លែឃ្លោកធំ | មូលដូចស៊ុតមាន់។ |
ដាក់ទ្រព្យសម្រាប់គ្រប់គ្រាន់ | គ្រឿងទិព្វសុវណ្ណ | ភោជនាហារ។ |
ទើបផ្ដាំថែទាំកិច្ចការ | ថាហៃកញ្ញា | រ័ត្នរាជបុត្រី។ |
ចិន្ដាប្រាថ្នាអ្វីៗ | ចូរយកអំពី | ក្នុងថង់នេះបាន។ |
ដូចចិត្ដគន់គិតរិះធ្យាន(៥) | បរិបូណ៌ពុំខាន | បានដូចប្រាថ្នា។ |
ស្ដេចដាក់វរល័ក្ខណ៍ធីតា | ក្នុងថង់ថ្លៃថ្លា | ហើយអធិដ្ឋាន។ |
ឲ្យតែសត្វឆ្កែតិរច្ឆាន | មកព្រុសឲ្យបាន | ដឹងដល់កុមារ។ |
ផ្សងស្រេចសម្ដេចឥន្ទ្រា | សេ្ដចហោះលីលា | ឆ្ពោះទៅសួគ៌ឋាន។ |
(1).កំពូលជាធំលើសលែងទេវតា គឺស្ដេចនៃទេវតា។ (2) នរនាថ=ជាទីពឹងនៃជន។ (3). ទូរទី=ទីឆ្ងាយ ស្រុកឆ្ងាយ។ (4). ពណ្ណរាយ= រាយពណ៌ ឆ្លាសច្រើនពណ៌។ (5). រិះធ្យាន= រិះរេ គន់គិត។