មហាសង្ក្រានឆ្នាំមមីឆស័ក
ពស២៥៥៨ គស ២០១៤
មស១៩៣៦ ចុស១៣៧៦
ស្រង់ចេញពីមហាសង្ក្រាន្ដ គណកម្មាធិការជាតិរៀបចំបុណ្យជាតិអន្ដរជាតិ
ថ្ងៃចន្ទ ទី14.មេសា 2014.ម៉ោង 0:00
****************************
មហាសង្ក្រានឆ្នាំមមី ឆស័ក ព.ស២៥៥៨ ចូលមកនៅថ្ងៃចន្ទ ទី14 មេសា វេលាម៉ោង8និង07នាទីព្រឹក។
ឆ្នាំមមី ឆស័ក
សុភមស្តុ! វរមង្គលាជយាតិរេក
ព្រះពុទ្ធសករាជព្រះសាសនា អតិក្កន្តាកន្លងទៅហើយបាន២៥៥៧ត្រឹមថ្ងៃ១៥កើត ខែពិសាខ លុះដល់ថ្ងៃ១រោច ខែពិសាខ ឆ្នាំមមីឆស័កតទៅ ចូលពុទ្ធសករាជ២៥៥៨ ។
នឹងគណនាឆ្នាំមមីឥឡូវនេះសង្ក្រាន្ដចូលមកនៅថ្ងៃចន្ទ ១៥កើត ខែចេត្រ ត្រូវនឹងថ្ងៃទី១៤ ខែមេសា គ្រិស្តសករាជ ២០១៤ វេលាម៉ោង៨និង០៧នាទីព្រឹក ។ ពេលនោះ ព្រះអាទិត្យចេញពីមីនរាសីទៅឋិតនៅឯមេសរាសីតាមផ្លូវគោវិថី គឺផ្លូវកណ្តាល ទើបមានទេវធីតាមួយព្រះអង្គជាមគ្គនាយិកាព្រះនាម គោរាគៈទេវី ជាបុត្រីទី២នៃកបិលមហាព្រហ្ម គង់នៅចាតុម្មហារាជិកា ទ្រង់អម្ពរ ពណ៌លឿង លម្អព្រះកាណ៌ដោយសៀតផ្កាអង្គាបុស្ប អាភរណៈទ្រង់ពាក់ កែវមុក្តា ភក្សាហារទ្រង់សោយតេលំ ព្រះហស្តស្តាំទ្រង់ព្រះខ័ន ព្រះហស្តឆ្វេងទ្រង់ឈើច្រត់ ទ្រង់គង់លើខ្នង ព្យគ្ឃៈ (ខ្លា)ជាពាហនៈ ។ ទើបនាំអស់ទេវបុត្រទេវធីតាទាំងមួយសែនកោដិ ហោះទៅកាន់ គុហាកែវធម្មមាលី នាទីភ្នំកៃលាស ខេត្តហិមពាន្ត ជាទីតម្កល់់ទុកនូវព្រះសិរសា កបិលមហាព្រហ្ម ដែលតម្កល់លើពានមាស នាំមកដង្ហែប្រទក្សិណភ្នំព្រះសុមេរុរាជ តាមផ្លូវព្រះអាទិត្យចរចំនួន៦០នាទី(២៤ម៉ោង) ។
ទើបនាំយកទៅតម្កល់ទុកនៅកន្លែងដើមវិញ ហើយប្រជុំទេវបុត្រ ទេវធីតាទាំងមួយសែនកោដិ ចូលទៅស្រង់ទឹក អនោតត្តមហាស្រះ ដែលមានទឹកហូរចេញ ពីបំពង់ថ្មកែវជាមាត់គោឧសភរាជទាំង៧ ត្រជាក់ក្សេមក្សាន្តព្រះរាជហឫទ័យហើយ នាំគ្នាចូលទៅសមាទានរក្សាសីល ដោយសោមនស្សរីករាយគ្រប់ព្រះអង្គ ក្នុងភគវតីសភាសាលាដែលវិស្សកម្មទេវបុត្រនិមិ្មតថ្វាយ ដើម្បីបន្ទោបង់អពមង្គលឱ្យជ្រះស្រឡះ ហើយចម្រើននូវសិរីសួស្តី ជ័យមង្គល ជន្មាយុយឺនយូរ ដល់ទេវតា និងមនុស្សសត្វផងទាំងឡាយតាំងពីឆ្នាំថ្មីចូលមកនេះបានធូរទូលំទូលាយ សុខក្សេមក្សាន្ត តរៀងទៅ។ ថ្ងៃចន្ទ ១៥កើត ខែចេត្រ ត្រូវនឹងថ្ងៃទី១៤ ខែមេសា គ្រិស្តសករាជ២០១៤ វេលាម៉ោង០៨ និង០៧នាទីព្រឹក ជាថ្ងៃចូលឆ្នាំមមី ឆស័ក (ថ្ងៃមហាសង្ក្រាន្ត) ។ ថ្ងៃអង្គារ ១រោច ខែចេត្រ ត្រូវនឹងថ្ងៃទី១៥ ខែមេសា គ្រិស្តសករាជ២០១៤ជាវារៈវ័នបត ។
ថ្ងៃពុធ ២រោច ខែចេត្រ ត្រូវនឹងថ្ងៃទី១៦ ខែមេសា គ្រិស្តសករាជ ២០១៤ នៅវេលាម៉ោង១២និង០៩នាទី ជាវារៈឡើងស័ក គម្រប់ជាសង្ក្រាន្តបីថ្ងៃស្រេចបរិបូណ៌ចូលជាសកល ឆ្នាំមមី ឆស័ក ចុល្លសករាជ១៣៧៦ និងមហាសករាជ ១៩៣៦ តទៅ ។ ក្នុងឱកាសសង្ក្រាន្តទាំងបីថ្ងៃ សូមអស់ប្រជាពលរដ្ឋប្រុសស្រីផងទាំងឡាយ រៀបចំពលីការគ្រឿងសក្ការបូជា អុជប្រទីបជ្វាលាថ្វាយព្រះរតនត្រ័យ និងទទួលស្វាគមន៍ ទេវបុត្រទេវធីតាឆ្នាំថ្មី ហើយខំលះបង់ចិត្តអាក្រក់អន្យតិរ្ថិយ ជាចិត្តអប្រិយជាប់ដោយគំនុំគុំកួន ព្យាបាទឈ្នានីស ដែលកើតមានក្នុងឆ្នាំចាស់ឱ្យជ្រះស្រឡះ តាំងចិត្តប្រព្រឹត្តល្អប្រកបដោយ មេត្តា ករុណា មុទិតា ឧបេក្ខា និងបញ្ញា ធ្វើបុណ្យសុន្ទរ៍ទានតាមប្រពៃណី រក្សាសីលប្រាំឱ្យបានជាប់ជានិច្ច នោះទេវតានឹងឱ្យពរ សព្ទសាធុការ លោកអ្នក នឹងមានសិរីសួស្តី សុភមង្គល វិបុលសុខ គ្រប់ប្រការ តាំងពីឆ្នាំថ្មីនេះតរៀងទៅ ។
រណ្តាប់ទទួលទេវតា
រណ្តាប់ទទួលទេវតាតាមទំនៀមពីបុរាណរៀងរហូតមក ត្រូវរៀបរានទទួលទេវតានៅខាងមុខផ្ទះមួយសម្រាប់ តាំងគ្រឿងពលីការផ្សេងៗ។ ត្រូវរៀបក្រាលសំពត់ពណ៌ស ហើយរៀបចំនូវគ្រឿងសក្ការបូជាទេវតា មានជាអាទិ៍ បាយសី ៩ថ្នាក់មួយគូ បាយសី៧ថ្នាក់មួយគូ បាយសី៥ថ្នាក់មួយគូ បាយសី៣ថ្នាក់មួយគូ បាយសីប៉ាឆាមមួយគូ ស្លាធម៌មួយគូ ទឹកអប់មួយគូ (ទៀន៥ ធូប៥) លាច៥ ផ្កា៥ដាក់លើជើងពាន១គូ ចេកនួន ចេកណាំវ៉ា ជើងពានមួយគូ ផ្លែឈើ១១មុខ រៀបដាក់ជើងពាន១១គូ ដូងឡៅមួយគូ ទឹកស្អាតពីរកែវ ។ ឆ្នាំនេះគួររកប្រេង ដាក់ទទួលទេវតាផង ព្រោះជាភក្សាហាររបស់ទេវធីតា។ ស្រេចហើយនៅវេលាម៉ោងដែលទេវតាចុះមក ត្រូវជួបជុំក្រុមគ្រួសារដើម្បីថ្វាយបង្គំព្រះ នមស្ការព្រះរតនត្រ័យ សមាទានសីល ហើយតាំងចិត្តឱ្យបានស្អាតបរិសុទ្ធ ជ្រះស្រឡះនូវមន្ទិលទាំងពួង តម្កល់ចិត្តរំពឹងគិតទៅលើ ព្រះពុទ្ធ ព្រះធម៌ ព្រះសង្ឃ ជាទីពឹង ទីរឭកលុះចប់ពិធីទទួលទេវតា ។
ចំពោះបាយសី៩ថ្នាក់ ៧ថ្នាក់ តំណាងឱ្យព្រះរាជា ព្រះបរមរាជវាំង ចំពោះប្រជារាស្ត្រគួរធ្វើត្រឹម៥ថ្នាក់ចុះមក ឬរៀបត្រឹមគ្រឿងសក្ការបូជាដែលមានទៀនប្រាំ ធូបប្រាំ ស្លាធម៌កូនចេកមួយគូក៏ល្អដែរ ។ ចំពោះផ្លែឈើសម្រាប់ប្រជារាស្ត្រ គួររៀបឱ្យបានត្រឹម៣ឬ៥មុខជាការប្រសើរ គឺរៀបទៅតាមធនធានរបស់ខ្លួន ។ នៅគ្រប់តង្វាយទាំងអស់ ត្រូវដាក់ផ្កាម្លិះភួងពីលើគ្រប់តង្វាយនៅលើជើងពាន និងលើបាយសីត្រូវដោតទៀនហើយដុតបំភ្លឺ ។
ទំនាយតាមថ្ងៃសង្ក្រាន្ត
ទំនាយថ្ងៃមហាសង្ក្រាន្ត ៖ ថ្ងៃចូលឆ្នាំដែលជាថ្ងៃទី១ត្រូវនឹងថ្ងៃ ចន្ទ ទំនាយថា ឆ្នាំនេះនឹងចាញ់ឯសេនាបតី ជំទាវខុនណាងទាំងឡាយ (ចាញ់ មានន័យថាអន់ ខូចបុណ្យស័ក្តិ អន់រាសីមានវិបត្តិ) មានភ្លៀងច្រើននៅដើមឆ្នាំ ស្រូវអង្ករល្អណាស់តែមនុស្សនៅជួបផលលំបាក ឱ្យក្រែងប្រយ័ត្នក្សត្រ និងមន្ត្រីជំទាវធ្វើអាក្រក់ធ្វើបាប នឹងកើតការតស៊ូរើបម្រះ មនុស្សទូទៅនឹងកើតជំងឺតម្កាត់ច្រើន ។
ទំនាយថ្ងៃវ័នបត ៖ ថ្ងៃកណ្តាលត្រូវនឹងថ្ងៃអង្គារ ទំនាយថា ឆ្នាំនេះស្លាម្លូ ត្រីសាច់ មានតម្លៃខ្ពស់ អាមាត្រមន្ត្រី នឹងខូចបុណ្យស័ក្តិ ឬត្រូវក្តៅក្រហាយចិត្តជាច្រើន ។
ទំនាយថ្ងៃឡើងស័ក ៖ ថ្ងៃចុងក្រោយត្រូវនឹងថ្ងៃពុធ ទំនាយថា ឆ្នាំនេះរាជបណ្ឌិតបុរោហិត អាចារ្យហោរាចារ្យ នឹងមានសេចក្តីសុខសាន្តសម្រាន្តជាអនេក ប៉ុន្តែនឹងមានដង្កូវក្រាស៊ីស្រូវបំផ្លាញដំណាំ ។
ការពិគ្រោះទៅលើព្រះរាជទេពធីតា នៅក្នុងឆ្នាំនេះ សង្ក្រាន្តចូលមកនៅថ្ងៃចន្ទ ១៥កើត ខែចេត្រ គឺថ្ងៃទី១៤ ខែមេសា គ្រិស្តសករាជ ២០១៤ ដោយហេតុនេះទេវធីតារបស់កបិលមហាព្រហ្ម ដែលជាមគ្គនាយិកាប្រចាំឆ្នាំមមីនេះ មានព្រះនាមថា «គោរាគៈ ទេវី» ៖
- ១-ព្រះនាម គោរាគៈទេវី
- ២-គ្រឿងទ្រង់និងផ្កា អម្ពរពណ៌ លឿងសៀតផ្កាអង្គាបុស្ប
- ៣-អាភរណៈ កែវមុក្តា
- ៤-ភក្សាហារ តេលំ(ប្រេង)
- ៥-សាស្ត្រាវុធ ព្រះហស្តស្តាំព្រះខ័ន ព្រះហស្តឆ្វេងឈើច្រត់
- ៦-ពាហនៈ និងការធ្វើចលនា ទ្រង់ឈរបើកព្រះនេត្រលើខ្នងព្យគ្ឃៈ (ខ្លា) ។
ឆ្នាំមមី
លោកអ្នកកើតឆ្នាំមមី ពង្សទេវតាស្រីនាមជាសត្វសេះ ធាតុភ្លើង អង្សាកំណើតនៅថ្ងៃសៅរ៍ សិរីធ្លាក់មកពីដៃស្តាំរបស់ព្រះព្រហ្ម មូលព្រលឹងនៅនឹងដើមចេក ។ កាលណាទៅរស់នៅកន្លែងណាទីណា ឱ្យរករំសេវឬដីខ្សាច់ទៅដាក់ពូនគល់ចេក រកដើមចេកមកដាំទុកខាងជើង និងខាងលិចផ្ទះដែលខ្លួនរស់នៅ ទើបនឹងមានសិរីមង្គលរស់នៅត្រជាក់ត្រជំជាសុខ ។
មនុស្សកើតឆ្នាំនេះ រមែងមានឫកពាក្រអឺតក្រទម តែសន្តានចិត្តល្អ ជាទីពឹងពាក់ពំនាក់អាស្រ័យនៃញាតិមិត្តបាន ។ ពាក្យសម្តីនិយាយច្រើនគ្រោតគ្រាតមិនសូវទន់ភ្លន់ ។ សត្រូវច្រើនកើតបានដោយសារសម្តីរបស់ខ្លួន ។ ជាមនុស្សមានវាសនាខ្ពស់ មិនអាចអ្នកណាប៉ុនប៉ងពាធាបានឡើយ ។
កាលនៅពីតូចច្រើនលំបាកវេទនា តែដល់ចូលវ័យចាស់នឹងក្លាយជាអ្នកមានស្តុកស្តម្ភ ពីព្រោះជាមនុស្សមានសតិបញ្ញាឈ្លាសវៃ ប៉ិនប្រសប់ក្នុងការរកស៊ី យល់នូវជម្រៅគ្រប់ល្បិចកលរបស់មនុស្ស ។ ចូលចិត្តភ្លេងភ្លាត់និងល្បែងផ្សេងៗ បើផ្លាស់លំនៅទៅទីដទៃល្អប្រសើរជាងនៅក្នុងទីកន្លែងកំណើត ។
មុខរបរដែលស័ក្តិសមនឹងមនុស្សកើតឆ្នាំនេះ គឺពេទ្យ គ្រូហ្ម អ្នកវិទ្យាសាស្ត្រ មេធាវី និងជាអ្នកជំនួញជួញប្រែ ។ បើធ្វើការងារដែលយកកម្លាំងកាយទៅប្តូរ ដូចជាធ្វើស្រែចំការ ច្បារដំណាំ នឹងបានផលជាមធ្យម ។
ព្យាករណ៍អ្នកកើតឆ្នាំមមី
តាំងពីអាយុ ០៦ ឆ្នាំ ដល់ ៨០ ឆ្នាំ
បុរសអាយុ ៩,១៤,២១,២៦,៣៣,៣៨, ៤៥, ៥០, ៥៧, ៦២, ៦៩, ៧៤, ៨១ឆ្នាំ
និងស្ត្រីអាយុ : ១៤,១៩,២៦, ៣១, ៣៨, ៤៣, ៥០, ៥៥, ៦២, ៦៧, ៧៤, ៧៩ឆ្នាំ
ទំនាយថា : ជាឆ្នាំនាំមកនូវជោគលាភសក្ការៈ គិតប្រកបការងារអ្វីៗតែងតែបានសម្រេចដូចសេចក្តីប្រាថ្នាគ្រប់ប្រការ ដែលអាចចែកចេញបានដូចតទៅនេះ៖
ជោគលាភ : នឹងបានទ្រព្យសម្បត្តិ លុយកាក់មាសប្រាក់ និងវត្ថុមានតម្លៃគ្រឿងប្រដាប់លម្អគេហដ្ឋាន ដីធ្លីឬបានឡើងប្រាក់ខែ និងប្រាក់បំណាច់ឆ្នាំ រង្វាន់ផ្សេងៗទៀត ។
កិត្តិយស : ការសិក្សា នឹងប្រឡងជាប់ដូចសេចក្ដីប្រាថ្នា បើនៅទំនេរនឹងបានការងារធ្វើ បើមានការងារធ្វើស្រាប់ហើយនឹងបានឡើងមុខតំណែងខ្ពស់ឡើង ។
កេរ្តិ៍ឈ្មោះ : នឹងទទួលបានសេចក្ដីនិយមរាប់អាន លើកតម្កើងមុខមាត់ពីមនុស្សក្នុងមជ្ឈដ្ឋានការងារ ឬនៅក្នុងផ្ទះ ជាទីពេញចិត្តដល់ខ្លួនឯង និងអ្នកដទៃ ។
សេចក្តីសុខ នឹងជួបប្រទះសេចក្ដីស្នេហ៍ដ៏បរិសុទ្ធ ឯអ្នកដែលមានគូគ្រងហើយ នឹងមានបុត្រជាទីស្រឡាញ់ពេញចិត្ត សេចក្ដីសុខនឹងកើនទ្វេឡើងថែមទៀត ។
បុរសអាយុ : ៣៨,៤៥,៥០,៥៧ឆ្នាំ
និងស្ត្រីអាយុ: ៣៨,៤៣,៥០ឆ្នាំ
ទំនាយថា : បើរៀបអាពាហ៍ពិពាហ៍ហើយនឹងមានកូន បើនៅលីវនឹងបានរួមរក្សអភិរម្យសមសេចក្តីបំណងប៉ងប្រាថ្នា ឬបានទទួលលាភសក្ការៈ ជាវត្ថុមានជីវិតផ្សេងៗទៀតចូលមកនៅក្នុងផ្ទះ ។
បុរសអាយុ : ១០,១៣,២២,២៥,៣៤,៣៧,៤៦,៤៩,៥៨,៦១,៧៣,៨២ឆ្នាំ
និងស្ត្រីអាយុ : ០៩,១២,២១,២៤,៣៣,៣៦,៤៥,៤៨,៥៧,៦០,៦៩,៧២ឆ្នាំ
ទំនាយថាៈ ជាឆ្នាំនាំមកនូវគ្រោះកាច ឱ្យប្រញាប់ប្រុងប្រយ័ត្នខ្លួន ដែលអាចចែកចេញបានដូចតទៅនេះ៖
១-នឹងជួបប្រទះរឿងទុក្ខសោកខូចចិត្ត ដោយពពួកសត្រូវ ក្រុមពាលទាំងឡាយប៉ុនប៉ងព្យាបាទ កុំធ្វើដំណើរទៅទីស្ងាត់ និងពេលរាត្រីព្រោះនឹងត្រូវចោរខ្មួយគំរាមកំហែង ។
២-រោគាព្យាធិបៀតបៀនកាយ សត្វអា
សិរិ្ពសទិច ឬខាំធ្វើឱ្យអស់សេចក្តីសុខមិនមានសេចក្តីសប្បាយ ។
៣-លុយកាក់ត្រូវចំណាយច្រើនទាំងក្នុងផ្លូវដែលចាំបាច់ និងមិនចាំបាច់ ដែលអាចហៅបានថា ជាឆ្នាំដែលចុះដើមទុនក្នុងផ្លូវដែលចាំបាច់ និងជាឆ្នាំនៃការចំណាយទៅក្នុងផ្លូវដែលមិនចាំបាច់ បើធ្វើជំនួញជួញប្រែនឹងត្រូវខាតដើមទុន ។
៤-សង្ឃឹមផលប្រយោជន៍ទៅលើផ្លូវអ្វីច្រើនតែខុសភ្លាំងភ្លាត់ ប្រាក់ចំណូលតិចជាងប្រាក់ចំណាយ ឬបានមកហើយចាយអស់ទៅវិញ ។
៥-បងប្អូនញាតិមិត្តដែលធ្លាប់ស្រឡាញ់រាប់អានគ្នានឹងប្រែក្លាយជាសត្រូវ។
៦-ទីលំនៅ ឬកន្លែងធ្វើការត្រូវផ្លាស់ប្តូរ ឬធ្វើដំណើរទៅស្រុកឆ្ងាយ ឬបើលោកអ្នកមិនចាកចេញទៅទេ ក៏គង់មានមនុស្សនៅក្នុងផ្ទះចាកចេញទៅដែរ ។
៧-ទទួលរងសេចក្តីយ៉ាប់យឺន លំបាកលំបិន ឬនឿយហត់ជាខ្លាំង ទាល់តែមានមានះ និងអត់
ធន់ ។
៨-ធ្វើការងារជាមួយអ្នកដទៃនឹងត្រូវគេឆបោក បងប្អូនញាតិមិត្តស្និទ្ធស្នាល ប្រែក្លាយទៅជាសត្រូវ កន្លែងធ្លាប់ទៅនឹងត្រូវក្តៅក្រហាយ ឬត្រូវគេបណ្តេញចេញ ចិត្តថ្លើមអន្ទះអន្ទែង ។
បុរសអាយុ : ១១,១២,២៣,២៤,៣៥,៣៦,៤៧,៤៨,៥៩,៦០,៧១,៧២ឆ្នាំ
និងស្ត្រីអាយុ : ១៦,១៧,២៨,២៩,៤០,៤១,៥២,៥៣,៦៤,៦៥,៧៦,៧៧ឆ្នាំ
ទំនាយថា : ឆ្នាំនេះជាឆ្នាំនៃប្រក្រតីកាល គឺមិនល្អណាស់ ហើយក៏មិនអាក្រក់ណាស់ណាដែរ។ ការសិក្សាបានត្រឹមប្រឡងជាប់មិនធ្លាក់ ប្រកបការងារបានផលល្មម បើធ្វើជំនួញជួញប្រែបានត្រឹមមិនខាតដើម ។
បងប្អូនញាតិមិត្តជិតឆ្ងាយ បើឧស្សាហ៍ទៅ មករាប់រកគ្នាទើបអាចផ្សារភ្ជាប់ចំណងសាមគ្គីបានល្អ ។
ការងារអ្វីៗអាស្រ័យដោយការព្យាយាម ហើយប្រើការពិនិត្យពិចារណាល្អិតល្អន់ ទើបអាចរកផលកម្រៃបាន ។ សេចក្តីស្នេហាត្រូវប្រើសេចក្តីមានះព្យាយាម ទើបសម្រេចផល និងអាចរឹតចំណងស្នេហារវាងគ្នានឹងគ្នាបានជាបង្គួរ គឺមិនល្អពេក ហើយក៏មិនអាក្រក់ពេក ដល់ទៅដាច់ដោចលែងលះផ្តាច់មគ្គសង្វាសគា្នដែរ ។
បុរសអាយុ: ០៦,១៧,១៨,២៩,៣០,៤១,៤២,៥៣,៥៤,៦៥,៦៦,៧៧,៧៨ឆ្នាំ
និងស្ត្រីអាយុ: ១០,១១,២២,២៣,៣៤,៣៥,៤៦,៤៨,៥៨,៥៩,៧០,៧១ឆ្នាំ
ទំនាយថា: ឆ្នាំនេះជាឆ្នាំស្រមោលអន្ទោលតាមប្រាណ គឺនៅក្នុងឆ្នាំនេះបើលោកអ្នកធ្វើល្អនឹងបានទទួលផលល្អ បើធ្វើអាក្រក់បានអាក្រក់តបស្នងវិញយ៉ាងប្រាកដ ។ ធ្វើការងារអ្វីៗ ប្រដូចទៅនឹងស្រមោលអន្ទោលតាមប្រាណ បើខុសហើយ គឺត្រូវទទួលផលកម្មដោយគ្មានការអភ័យ ឬបន្ធូរបន្ថយ គ្មានផ្លូវនឹងផ្លាស់ប្តូរកែកុនថាធ្វើអាក្រក់ឱ្យក្លាយទៅជាល្អ ឬធ្វើល្អទៅជាអាក្រក់បានទេ បើទុកជាគេជួយក៏ជួយមិនរួចដែរ ។
បុរសអាយុ: ០៨,១៥,២០,២៧,៣២,៣៩,៤៤,៥១,៥៦,៦៣,៦៨,៧៥,៨០ឆ្នាំ
និងស្ត្រីអាយុ: ០៨,១៣,២០,២៥,៣២,៣៧,៤៤,៤៩,៥៦,៦១,៦៨,៧៣,៨០ឆ្នាំ
ទំនាយថា: ឆ្នាំនេះជាឆ្នាំនៃការមានជោគលាភ ប៉ុន្តែនឹងល្អបានទៅតាមលំដាប់ គឺចាប់តាំងពីដើមឆ្នាំ ហើយនឹងចេះតែកើនទ្វេឡើងៗពីតិចទៅច្រើនជាលំដាប់រហូតដល់ចុងឆ្នាំ ។ ការសិក្សានឹងចេះតែរីកចម្រើនទៅមុខបន្តិចម្តងៗ លុះដល់ចុងឆ្នាំទើបល្អពេញកម្រិត ។
ការងារអ្វីៗ ក៏ដូចគ្នាដែរ នៅដើមឆ្នាំមិនសូវមានការរីកចម្រើនខ្លាំងប៉ុន្មានទេ លុះដល់ទៅកណ្តាលឆ្នាំទើបឃើញផលល្អជាមធ្យម ហើយចុងឆ្នាំទើបទទួលផលពេញបរិបូរណ៍ ។
ភាពរីកចម្រើននឹងឃើញបានចាប់ពីខែឧសភាឡើងទៅ ហើយចេះតែកើនចម្រើនតទៅ ជាលំដាប់រហូតពេញលេញបរិបូរណ៍ដល់ទៅចុងឆ្នាំ ។
បុរសអាយុ: ០៧,១៦,១៩,២៨,៣១,៤០,៤៣,៥២,៥៥,៦៤,៦៧,៧៦,៧៩ឆ្នាំ
និងស្ត្រីអាយុៈ ០៦,១៥,១៨,២៧,៣០,៣៩,៤២,៥១,៥៤,៦៣,៦៦,៧៥,៧៨ឆ្នាំ
ទំនាយថាៈ ឆ្នាំនេះជាឆ្នាំមានគ្រោះថ្នាក់ធំ ចូរប្រុងប្រយ័ត្នឱ្យមែនទែន ព្រោះហេតុនឹងកើតឡើងបានជាច្រើនប្រការគឺ៖
១-កើតហាយនៈលិចលង់ គឺត្រូវខូចខាតលុយកាក់អស់រលីងពីខ្លួន ។
២-កើតការផ្លាស់ប្តូរ ព្រាត់ប្រាសនិរាសចាកចោលគ្នា ដោយសត្រូវធ្វើទោស ឬជួបសេចក្តីទុក្ខលំបាក ឬត្រូវធ្វើដំណើរទៅស្រុកឆ្ងាយដោយមានហេតុចាំបាច់ ។ ចំពោះអ្នកដែលមានបំណងនឹងផ្លាស់ប្តូរ ឬចង់ធ្វើដំណើររមែងបានដូចក្តីបំណង ។
៣-បងប្អូនញាតិមិត្តជាទីស្រឡាញ់ នឹងប្រែក្លាយទៅជាសត្រូវ ស្អប់ខ្ពើមគ្នា ។
៤-ត្រូវគេឆបោកកេងប្រវ័ញ្ចធ្វើបាប ឱ្យខូចខាតនូវរបស់ជាទីស្រឡាញ់ជាទីគាប់ចិត្ត។
៥-ត្រូវចោរលួច ឬភ្លើងឆេះឱ្យបានទទួលសេចក្តីក្តៅក្រហាយ និងការខកចិត្ត ។
៦-អ្នកធ្វើការជាមួយគ្នា មានគំនិតផ្តន្ទាឈ្នា
នីស ឬរង់ចាំចាប់កំហុស ជាហេតុធ្វើឱ្យទទួលទោសទណ្ឌធ្វើការងារច្រើនលើសលន់ ប៉ុន្តែ «សេចក្តីគួរគាប់» គ្មាន ត្រូវគេបោកបញ្ឆោតទៅក្នុងផ្លូវអកុសល ។
ថ្ងៃជាសិរីមង្គល
ថ្ងៃដែលជាសិរីមង្គល ដើម្បីជ្រើសរើសសម្រាប់ប្រើក្នុងពិធីសំខាន់ៗរបស់ខ្លួនដូចជា រៀបអាពាហ៍ពិពាហ៍ លើករាសី បុណ្យទានធំៗ ពិធីជាមង្គលផ្សេងៗដែលទាក់ទងនឹងសុវត្ថិភាព សេចក្តីចម្រុងចម្រើនរុងរឿងក្នុងជិវិតត្រូវចាប់ផ្តើមឡើងជាដំបូងគឺថ្ងៃ ៖ ១-ថ្ងៃសៅរ៍ ២-ថ្ងៃអាទិត្យ ៣-ថ្ងៃអង្គារ ៤-ថ្ងៃពុធ ៕